السيف والمعبر
طالت والسنين جروح ...
وبعدنا بعتبة المعبر .
طالت والجروح اشكال .
جرح قبله وجرح منبر ،
وجرح ظل عابد الخنجر .
مدري شلون جدحت وآنتشى الدخان ،
ولبس ثوب الحداد الشارع الاخضر .
صار سنين .......
مشغوله الغصون تحنّي جف النار ،
وبرهبة سكوت رماد تتكسّر .
آيا نار ، آيا نار ،
نزيف المحنرك يا نار .
ر..................................................
طالت واليطَـوْْل البال .....
يلوي ذراعها وتكَصر .
طالت والجذور آشكال ،
والطين الحضنها آلوان :
طين آبيض وطين آحمر وطين آسمر .
يا مالح جذر ، يل أدري بيك تموت ،
أنا ماآموت ،
ولو بيّه الوجع بسمر .
أنا ما آموت ،
أنا بثياب صبري مجفّن التابوت .
ر..................................................
حـرّمت السحر والخوف ،
والخبزه التجي من دجة المنحر .
طاحت سبحة الدرويش من اِيدي ،
وصحا آلسكان المخدر .
اِيد بطرك آصابعها وخرز تسبيح ،
ما تكسر ظهر موجه عراقيه .....
ولا تلكَالها معبر .
طاحت سبحة الدرويش من ايدي ،
وصار بجفي للتسبيح سيف آحمر ،
وخيط لثوب طول حديثه تتحسر .
أطول ليل ،
أسْوَد ليل ،
ميخدر أصابيعي ........
وآتيْه السيف وآتأسر ،
ميخدر أصابيعي .......
وآتيْه الخيط وآتعثر .
عرايا ، ودورة المغزل ستر .....
والسيف اِله حوبه .
يامالح جذر ، اصبر وراح تشوف .
آنا والكَمر والسيف ....
سويه ندوس عالمعبر ،
أكيد ندوس عالمعبر .
* عبد الكريم القصاب / شاعر عراقي
تعليقات
إرسال تعليق
اترك تعليقا يدل على انطباعك ورأيك بالموضوع