ياكلبي اشكثر مهموم
ابكثر هم البريء البالسجن محكوم
او يلتمن عليه كلهن ابوكت النوم
ياكلبي ولك بسك تره انذليت
كل عمرك كضيته هموم فوك اهموم
باوع بالمرايه وشوف حالك زين
صرت كلك اجروح ولابسات اهدوم
ملامح وجهي راحت والظهر مكسور
او ضل بس الحزن فوك الوجه مرسوم
لاتعتب بعد ذاب الملح بالماي
جا تعتب عليمن ياكلب وتلوم
صدك لو طحت محد يجي ايباريك
او يمد ايده ويكلك هاك جفي وكوم
عافوك ومشوا كلمن عرف مسراه
ضل اوحيد وهمومك عليك اتحوم
ضل ابمستحاك و صاحب الحيطان
وانطر خبر موتك ولو مامعلوم
تره الضلن اوشاله وعبرن الستين
او يافشلة الفشله لو متت مهظوم
عبد الجليل قاسم الكعبي
تعليقات
إرسال تعليق
اترك تعليقا يدل على انطباعك ورأيك بالموضوع