شلهــــــــاك.
الى ذلك الحُلم الجميل الذي قد يأتي وقد لا يأتي
نذر.....
لو ليله طيفك يشبك العين
لوسم الشيب واشعل شمعه بالبيت
يكلبي ابغير فيك ماعشك في
وعدى بابك عُمر ما باب دكيت
ابحزن..ومهدلات الصدر وياي
ينعن .طول ماني اعليك ونيت
على ضهر النوايب صرت خيال
لبيوت الأودهم أمس مريت
ودثرني الفشل مامش بعد ناس
ابجدم مهضوم يابوالحيف رديت
كضت جلمة وفه وماتوا اليوفون
ومراكب شوكنه حمل توابيت
عفتني ويه الكواسر معري الجفوف
لا هد حيلي خوف!!ولا توانيت
رعدت والرياح اتمرجح الكاع
جفت ماعون صبري وماتبديت
عطش فت الجبد والماي طوفان
مارف الكلب نوبه وترويت
هلي بلا مايكم ما وآلمت ماي
ولاحكمت صلاتي وليه تدنيت
اتيمم والتراب معفر ابدم...
مدري بيا شرع بالدم توضيت
وبجت....
بجت ياما بجت وادم على الصار
وبس آنه لعد الصار غنيت
اليودونك على فراكك يلومون
وآنه من الملامه اعليك مليت
فلك بيه الوكت ناسك يبو الناس
تَهد جفوف غيضك منته الك صيت
غزل متخلبص وما ضلت أجفوف
وتساوه العدل ياحمد والميت
تنث بيه الجروح وتنزف أهموم
وعسى جفي كطع لو جرح داويت
رهم كلبي عليهن بأول اصيار
الجرح مثل الأخو لوصدك خاويت
يبرد واغفى ساعه وتسكن الآه
ومثل البار ابوه بكبر باريت
أنه برجاك ياسر هاي الجروح
رجاي انته وجذب غيرك ترجيت
متوسد المنيه وضال برجاك
يجيدوم الزلم شلهــــــــاك ماجيت ؟؟؟
يجيدوم الزلم شلهــــاك ماجيت؟؟؟؟
( شعر شعبي عراقي )
كاظم الثعالبي
22/آذار/1991
تعليقات
إرسال تعليق
اترك تعليقا يدل على انطباعك ورأيك بالموضوع