اغط ونبك طويل النفس لاجلن ولاملن
وناحر روجهم كوه----
وسابك ريحهم كوه----
وعلى الغبرات لاميلن ولاشدن
ولاوي اجفوف تتباهه ابسيفنتكم
سبع مرات يوميه--
وحط روحي ابدربكم خوف
حتى اعرف هذاك البيك والبيه
يسفان الوكت وك هوب
كلبك مابعد يحمل ولك نيه
دريض دوكف اشويه-----
اليبوك الناس لازم يوم تفترسه الحراميه
بعد دنياك عزتها ابزمر تفكه--
وربيع العام دك للصيف جوبيه
وبعد نهر الفرات ابفيض
ماجفت سواجيه===
وبعد دجله العزيزه امشذره افيها
وبعد ذيج النوارس تسبح ابميها--
وبعد ذاك الشعر تمثال--
ماعجزت قوافيه------------
وبعد نعش الهوه المد فون
يتنفس جمر بيه///
اكتلتني الروحه والجيه ---
جم غيهب رجع مذلول
من لاوه الجفوف الدكت الخيه
وجم شير الشرب ذرنوح //
من طاح السرج من فوك العبيه
شفت خيط الشمس نهران ==
جي فيروز ماغفه ابجواليه
واذا خنيابكم سورب--
يطك جرف الجروح وتطلع الحيه
ويهب بارح عصف بركان ويهز ابسواطيره
نهرنه اتكنطر امن الخوف ماتفتر نواعيره
ولامن العمر فرحه ابسبب لن ماتت الديره
اشب نجمة صبح للحيد حتى اترس شواجيره
ويظل هذا الوطن محروس ماتغفه نواطيره
وذول احنه تعلمنه الصبر منك يبو الغيره
ونسينه ومانسينه الدم-----
شواربنه اتراجف غيظ من نزعل
يمر المستحه وننهظ
نخاف العار ومن العيب تتندم
ويفور الدم-----------
وبرده ابعمرك الماظاك غير الدم
وبني اجسور مابين الحياه والموت
وهدم سورك المبني على الصوبين ما اهتم
وسامر وحشة اضنوني ---
وظل ازعل على اعيوني----
ولاوي اجفوف طيفك من تلاويني
عطش والسنبل العطشان مايذبل
صفنتكه اشك ثنايا الكون--
بالصفنه التوديني----
اعلى طاري الاه ملجومين
وسنينك وجع غفه ابشراييني
يربان السفينه اشبيك ماتقبل تدليني
الشراع التاه ماتيه بكه ايسابك عصركم طور----
ويحطم اظنون البين ويلف بالعكس ويدور
يمشبك السكوت ايام حلمك بور--
يلنيتك تهل ويغني يم الهور---
لاادور ظلام وانت كلك نور
لازم يوم يتهدم عليك السور
مر خيال بالظمه شهر عاشور
جفه ايحشم الدنيا ويريد ايثور
مايدري البعث مغرور----
وانه عشت ابحلم مهجور
يالمارافكت حالي تهت ومروز كاعك
مادثرهن ماي
بس طوفان البعيني غطه مروزك
كبل لاتنخلق دنياي----
وغياب الثريه المسجب ابمزنه
ابد مايوم هل اوياي
مايك حار ياعنتيك-----
حتى اسهيل خالف مازرك بالماي
ونجوم النعش يبرلك ابممشاك
ومن اتيه حط نجم الجدي ابيمناك
حتى اتشوف دربك زين
لا لا اتيه--
ترى امن اتيه يتلكاك ذيب الزور
من توصلنه تلكانه الك صفين
صف جاب الشمس مجتوفه ابحبلين
والثاني ذبح دنياه كبل سنتين
ذول احنه بعد شتريد من عدنه
عراقيين للمر ماتجرعنه
ولاطخينه راس الذل
ولا ببحورهم مالت سفينتنه
ولا تيار رد ابلامنا امن الريح
بس واحد واحد صرخته ابساع ردتنه
مثل ردت نبي سليمان لبساطه
ابمحطة نوح حط الظيم ومتاعه
ابوسط بغداد غيرنه الحكم ساعه
1 / 5/ 1986
-------
-------
متابعة سلام سالم رسن
تعليقات
إرسال تعليق
اترك تعليقا يدل على انطباعك ورأيك بالموضوع