لا تستحين
هاي هية وداعتچ لا تستحين
دوسي فوگ الروح.. لابي .. توعدين و لاتجين
حبي غيري ..اتشاقي..اضحكي..صاحبي..وحقچ يحلوة تصاحبين
انتي مو اول حبيبه تشرح بسچينها ثياب الحنين
وليش كل احنة حزانى ..
لا يشيل هموم گلبچ..
يكفي بس اني حزين
يكفي اشيل اهمومچ..اهموم الشماته..اهموم دهري..
وكلهن بهالرگبة دين
وصيري صيري اشتشتهين
صيري ليل لوحدي اسهره
صيري شط بليل اعبره
صيري.. صيري اشتشتهين
يوم بيضة و يوم سمرة
يوم غيمة و يوم گمرة
صيري يا زرع العمر شتلة ونين
مو عجيبه…
اتموت گطرة ندى بخد الياسمين
واني وحده اللي احبها
وانتي يدري الله شكثرهم عاشگين..
وعاجبين
وما اگول اكثر شگولن؟
هو ذنبي لا سكنت وية الاجوني
ولا تبعت الراحلين
ولانه خالي و مختلي ومرتاح بالي
ولاني من العاشگين
ومدري ليلي شلون اخلصه
ولا سهرت وية السهارى
ولاني من النايمين
ولاني عابد و ارتجي الجنة امن اموت
ولاني من الكافرين
اني قصتي وياچ قصة
انكتبت ابورقة قديمة و خط حزين
وانا وين؟ وانتي وين؟
انا لحظة
اشجابها اللحظة تدگ باب السنين
وليش اوج و اشتكيلچ…
و انة اعرفچ تطفين النار ابانزين
و اعترفلچ انتي ما عندچ ذنب
و اعترفلچ اني چنت بلا گلب
شلي بعلوم الاحبها و تحب؟!
شلي بالعين الوسيعة الما تضم بصبيها تصوير المحب؟!!!
شلي بالنار بشتة العشاگ تطفة و ماتشب
شلي بالگذلة بهبوب الريح ماتلعب لعب
وانا وين؟ وانتي وين؟
وليش اوج و اشتكيلچ…
و انة اعرفچ تطفين الحريق ابانزين
وليش اموتن موت غيمة
وبالجزيرة الغيم خطوة تايهين
آه يا بنت الحلال
آه يا بنت الــــ….
لو اكو تأمين عالحب
چان اطالبهم يرجعولي و لو..
ثلث السنين
و لو ربع السنين
تعليقات
إرسال تعليق
اترك تعليقا يدل على انطباعك ورأيك بالموضوع