أنا دونك ما نطلب حد
وغير بابك ما نقصد باب
ولا إيدي لغيرك تتمد
ما دامك انت النواب
نلجالك كي يجِد الجَدْ
إذا انقطعت بي الأسباب
يا خالق أنا قلبي فد
ياربي عبدك مُذناب
وذنوبي ما ليها حد
موجودة عندك في كتاب
كي تعذب ما ظلمتش حد
كي تِغفر انت التواب
أنا جرى لي كما عْناق تشد
والذيب غرس فيه الناب
وتمزق لحمو وجبد
خلالو دمو سكاب
أنا مقصر والوعد نفد
مشدود من ثلاث ذياب
والنفس تزين وتقد
واغْواني إبليس الكذاب
مناني الملعون وعِدْ
طلع وعد في مَثيل سرابْ
والدنيا تدي وتَرد
غرتني كي كنت شباب
وأول عمر ابْن آدم وِدْ
و في عقابو تبدى الاتعاب
وغلاطني صغري بالجد
وماعملتش للكبر حساب
وما دريتش والعمر تَعد
وما فقتش لين شعري شاب
ونهاري تعدى وبرد
والشمس اتَكت لَغْياب
راح صغري ماعاد يصد
ومن طبعوا هو هراب
والكبر لَفَى عَليَّ يهِد
والقبر ينادي زراب
غدى فكري وتِلف شرد
ماعادش رأي مصواب
حَنى ظهري عَواجْ وهَوِدْ
للقاع قاعد يحداب
والدم تنشف من الخد
وتكمش وجهي وخياب
وثقل المسمع وتسد
لا سمعت بعاد ولا قراب
والفم تهدم وتهد
ما عاد مساعدني طياب
ولْساني رَزُنْ وتَعقدْ
ما عُْدتِش مفهوم جواب
رشى عظمي ورعش رعد
نتكبى ثقلت الاركاب
ورجلاي ثلاث بالعد
العكاز معاهم في الحساب
ولا صحة قعدت ولا جهد
تتعمد نشد في الأطناب
---------------------
(العناق صغير المعز ،، والاطناب بيت الشعر)
تعليقات
إرسال تعليق
اترك تعليقا يدل على انطباعك ورأيك بالموضوع